ទីបញ្ជាការសឹករងខេត្តបន្ទាយមានជ័យ ក្លាយជាទីតាំងទទួលបញ្ចាំរថយន្ត
06-June-2016 | ដោយ មែន កំសត់
ខេត្តបន្ទាយមានជ័យ ៖ យោងតាមការបំភ្លឺពីស្ត្រីឈ្មោះ ជុំ ដាលីន អាយុ៣១ឆ្នាំ មានផ្ទៃពោះ៥ខែ រស់នៅភូមិរំចេក៤ ឃុំរតនៈ ខេត្តបាត់ដំបង បានរៀបរាប់ឲ្យដឹងថា គាត់ជាជនរងគ្រោះ មានប្តីឈ្មោះ ប៉ាញ រដ្ឋា អាយុ៣១ឆ្នាំ មានមុខរបរជាអ្នករត់តាក់ស៊ី បាត់ដំបង-បន្ទាយមានជ័យ បានយករថយន្តម៉ាក LEXUS RX 300 ពណ៌ស ស៊េរីឆ្នាំ១៩៩៩ ពាក់ស្លាកលេខភ្នំពេញ 2P1150 មួយគ្រឿង ទៅដាក់បញ្ចាំជាមួយស្ត្រីមេកុងស៊ីម្នាក់ នៅក្នុងខេត្តបន្ទាយមានជ័យ ក្នុងតម្លៃទឹកប្រាក់ចំនួន១.៥០០ដុល្លារ ដោយគ្មានឯកសារ និងកិច្ចសន្យាអ្វីបន្តិចសោះឡើយ បន្ទាប់មកប្តីគាត់យកលុយទៅលេងល្បែងកាស៊ីណូមួយកន្លែងនៅក្រុងប៉ោយ ប៉ែត ចាញ់អស់លុយគ្មានសល់ ហើយក៏បានទូរស័ព្ទឲ្យរូបគាត់ជាប្រពន្ធមកលួសយករថយន្តពីម្ចាស់ កុងស៊ី រួចបិទទូរស័ព្ទគេចខ្លួនមិនចូលផ្ទះតែម្តង។
ហេតុការណ៍ខាងលើនេះ បានកើតឡើងកាលពីរសៀលថ្ងៃទី២ មិថុនា ២០១៦ ខណៈពេលដែលស្ត្រីរងគ្រោះឈ្មោះ ជុំ ដាលីន អាយុ៣១ឆ្នាំ បានជិះរថយន្តឈ្នួលពីខេត្តបាត់ដំបងមកទីរួមខេត្តបន្ទាយមានជ័យ តាមការណាត់របស់ស្ត្រីជាមេកុងស៊ីឈ្មោះ វ៉ាន់ វណ្ណារី អាយុ៤០ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ និងប្តីឈ្មោះ ភា ជានាយទាហានម្នាក់ មានឋានៈជាប្រធានការិយាល័យ ក២ នៃទីបញ្ជាការសឹករងខេត្តបន្ទាយមានជ័យ។
ស្ត្រីរងគ្រោះឈ្មោះ ជុំ ដាលីន បានបន្តថា ខណៈពេលដែលរូបគាត់បានទទួលទូរស័ព្ទពីស្ត្រីជាមេកុងស៊ី កាលពីព្រឹកថ្ងៃទី២ មិថុនា ភ្លាមនោះ រូបគាត់ក៏បានធ្វើដំណើរមកជាមួយនឹងម្តាយមកជួប ដើម្បីលួសយករថយន្តទៅវិញ ក៏ប៉ុន្តែអ្វីដែលធ្វើឲ្យពួកគាត់មានការភ័យខ្លាចនោះ គឺស្ត្រីជាមេកុងស៊ីរូបនោះបានណាត់ផ្លាស់ប្តូរទីកន្លែងរហូតដល់ ទៅ៣ដងឯណោះ ។ លើកទី១ ប្រាប់ថា ឲ្យមកជួបនៅប៉ោយប៉ែត លើកទី២ ឲ្យទៅជួបនៅផ្សារចំការ.គ ក្រុងសិរីសោភ័ណ និងណាត់លើកទី៣ ឲ្យពួកគាត់ទៅជួបនៅក្នុងបន្ទាយទាហានសឹករងខេត្តបន្ទាយមានជ័យតែ ម្តង ដើម្បីជួបចរចាគ្នាលួសយករថយន្តនោះមកវិញ ។
ស្ត្រីរងគ្រោះបានបញ្ជាក់ឲ្យដឹងយ៉ាងច្បាស់ថា នៅពេលដែលបានជួបនឹងស្ត្រីមេកុងស៊ីឈ្មោះ វ៉ាន់ វណ្ណារី និងប្តីឈ្មោះ ភា ធ្វើជានាយទាហាននៅក្នុងបន្ទាយសឹករងខេត្តនោះ ពួកគេបាននិយាយមកកាន់គាត់ថា រថយន្តខាងលើនេះ ត្រូវបានអ្នករត់តាក់ស៊ីយកមកបញ្ចាំក្នុងតម្លៃ១.៥០០ដុល្លារ ដោយពុំមានបានធ្វើកិច្ចសន្យាអ្វីឡើយ គឺគ្រាន់តែមានបុរសជាអ្នករត់តាក់ស៊ី២នាក់ផ្សេងទៀត ដែលធ្លាប់យករថយន្តមកបញ្ចាំជាមួយជាអ្នកធានាតែប៉ុណ្ណោះ ។
ស្ត្រីរងគ្រោះបន្ថែមឲ្យដឹងទៀតថា ដំបូងឡើងខណៈដែលរូបគាត់បានឃើញរថយន្តរបស់ខ្លួនវិញនោះ គឺគាត់មានបំណងចង់ប្តឹងឲ្យសមត្ថកិច្ចជួយអន្តរាគមន៍រកយុត្តិធម៌ផង ដែរ ដោយឃើញទង្វើរបស់ស្ត្រីមេកុងស៊ីដែលមានប្តីជានាយទាហានម្នាក់នោះ បានប្រព្រឹត្តិផ្ទុយទៅនឹងផ្លូវច្បាប់បែបនេះ ក៏ប៉ុន្តែពួកគាត់មិនហ៊ាន ដោយសារតែខ្លាចអំណាច បុណ្យស័ក្កិរបស់លោកនាយទាហានរូបនោះ ដែលបានយករថយន្តរបស់គាត់ទៅរក្សាទុកនៅក្នុងបន្ទាយទាហានសឹករង ខេត្តបន្ទាយមានជ័យនេះតែម្តង ។ ហើយបន្ទាប់មកពួកគាត់បានព្រមព្រៀងគ្នាពិនិត្យឯកសាររថយន្តធ្វើ កិច្ចសន្យាប្រគល់ទទួលរួច ក៏បានប្រគល់លុយឲ្យស្ត្រីជាមេកុងស៊ី និងលោកនាយទាហាននោះចំនួន១.៥០០ដុល្លារ ទើបពួកគេឲ្យយករថយន្តចេញពីបន្ទាយទាហានសឹករងខេត្តបន្ទាយមានជ័យនោះ ផងដែរ។
លោកវរសេនីយ៍ឯក អ៊ិន សារិន មេបញ្ជាការរងស្តីទីសឹករងខេត្តបន្ទាយមានជ័យ បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី៣ មិថុនា ឲ្យដឹងថា បញ្ហាទាំងអស់ខាងលើលោកអត់បានដឹងទេ ពេលនេះលោកជាប់រវល់ប្រជុំថ្នាក់ភូមិភាគ ចាំប្រជុំរួច លោកទូរស័ព្ទសួរនាំទៅលោកនាយទាហានជាកូនចៅរបស់លោកឈ្មោះ ភា នោះ រួចលោកនឹងចាត់ចែងតាមនីតិវិធីវិន័យរបស់កងកម្លាំងតែម្តង។
ចំនួនអ្នកទស្សនា
- ថ្ងៃនេះ2441
- ម្សិលមិញ14181
- សប្តាហ៍នេះ2441
- ខែនេះ117591
- ឆ្នាំនេះ117591
- សរុប20560047